ਸੁਚੱਜੀ ਨਾਰ

ਮਾਏ ਨੀ ਮਾਏ ਮੈਨੂੰ ਸਹੁ ਮਿਲਣੇ ਦੀ ਦਿਲ ਵਿੱਚ ਕਾਹਲ ਪਵੇ,

ਭਾਵੇਂ ਨਾ ਵੇਖਿਆ, ਨਾ ਸੁਣਿਆ ਹੀ ਅਜੇ,

ਰੜਕ ਵਿਛੋੜੇ ਪਰ ਉਸਦੇ ਦੀ ਕਾਲਜੇ ਨੂੰ ਹਰ ਦਮ ਟੀਸ ਦਵੇ |

ਰਹਾਂ ਉਡੀਕਦੀ ਮਿਲ ਜਾਵੇ ਕੋਈ ਜੋ ਪਤਾ ਮਾਹੀ ਥੀਂ ਦੱਸੇ,

ਭੱਜ-ਭੱਜ ਜਾਵਾਂ, ਸ਼ੁਕਰ ਮਨਾਵਾਂ,

ਜਿਉਂ ਕਰ ਭੁੱਜੀ ਅਸਾੜ ਦੀ ਕੋਈ ਸੌਣ ਆਏ ਤੇ ਨੱਚੇ ਹੱਸੇ |

ਆਉ ਸਹੇਲੀਉ ਚਰਖਾ ਡਾਹੀਏ ਗੀਤ ਬਿਰਹੇ ਦੇ ਗਾਈਏ,

ਤਾਂਘ ਦੀ ਤੰਦ, ਪ੍ਰੀਤ ਦੀ ਪੂਣੀ,

ਕੱਤ-ਕੱਤ ਅੱਠੇ ਪਹਿਰੀ ਆਪਣੇ ਸਹੁ ਨੂੰ ਸਦਾ ਰਿਝਾਈਏ |

ਵਸਲ ਮਾਹੀ ਦਾ ਜਿਸ ਨੂੰ ਮਿਲ ਜਾਵੇ ਉਹੋ ਨਾਰ ਸੁਚੱਜੀ,

ਉਹ ਮਾਹੀ ਵਿੱਚ, ਮਾਹੀ ਉਸ ਵਿੱਚ,

ਅਨਦਿਨ ਬਿਗਸੇ ਜਿਵੇਂ ਕੰਵਲ ਕੋਈ ਭਉਜਲ ਤੋਂ ਅਭਿੱਜੀ |